子華神出小電影派福利 「賀歲片」男角暴斃等拜山

黃子華作品從來貴精不貴多，特別係主演電影更加少產驚人，所以在兩個星期後、於本月15日上映的狗年賀歲片《棟篤特工》，係令觀眾同網民特別期待。不過，喺電影未上之前，子華神就先派福利，先出兩部小電影俾各位欣賞，呢兩套小電影名為《旋風腿》及《賀歲片》，片長各半粒鐘。

係，《旋風腿》真係熟口熟面，因為早於2012年時已經出過街，但原來《旋風腿》仲有一個神秘續集 ─ 《賀歲片》，今日終於曝光，子華說：「今年我會有一套賀歲片上叫做《棟篤特工》，但喺幾年前喺我個棟篤笑裏面拍咗個小電影，就叫做《賀歲片》，所以我就想喺呢套《棟篤特工》上之前，就送一套小《賀歲片》俾大家睇吓先。咁呢一套《賀歲片》你淨係睇佢，你就唔係咁明，要睇埋我上一套叫做《旋風腿》嘅短片，你睇完《旋風腿》就睇呢個小《賀歲片》，再去電影院睇大賀歲片《棟篤特工》，你新年就有三套戲睇啦，希望大家捧吓場，依家先嚟呢套小《賀歲片》或者《pre賀歲片之賀歲片》。」

《賀歲片》到底係乜東東呢？其實都幾大吉利是，係講拍賀歲片嘅男主角暴斃，大家笑到清明拜山見。

第一集嘅《旋風腿》，講述子華飾演的marketing職場人士，喺一日入面連環遇上黑到無倫嘅慘事，但憑着唔好輸、反敗為勝的理念和努力，將人生扭轉；所以《賀歲片》一開始，已經升呢的子華就要面對關公災難 ─ 一位男主角 (鄧智堅飾) 在拍攝賀歲片中途突然猝死，子華要諗計將一部已經預計冇人睇的垂死賀歲片，轉化為一部笑死人的賀歲片。

人生有好多不可能，再一次以反敗為勝為主題的小電影《賀歲片》，就等觀眾作為睇大賀歲片的熱身。值得一提係，《賀歲片》入面所有扮電影工作人員的演員，其實好多都係有料之人，包括白只、舞台劇資深演員鄧智堅及導演司徒慧焯等，令小電影更加出色。