連拍三片自獎歐遊 娜姐快閃挪威遇極光

周秀娜 (Chrissie)早前同朋友自plan十日去兩個國家旅行，由於時間太急，度了三轉才落實旅程，她原定計劃去巴塞隆拿，但發覺冬遊巴塞冇節目，即轉plan去芬蘭聖誕老人村住玻璃屋，又因時間太急玻璃屋full booking，結果轉去挪威特羅姆瑟（Tromso），同閨蜜住靚民宿等遇北極光，之後再去英國倫敦過新年。

，娜姐先到挪威，最開心係終於見到北極光，令她覺得好amazing，「最好彩係我有個朋友話，今年睇北極光係最佳嘅一年，幸運之神今年應該眷顧我。」挪威冬天氣溫零度以下，娜姐有備而戰帶兩大篋同行，她笑說：「我真係第一次準備咁多嘢，腳架、相機、背囊、保暖壺、手套、暖包，帶咗好多保暖打底衫褲。睇北極光嗰日係夜晚，又唔知幾時睇到，要長期喺出面，嗰晚我着咗三件打底衫，加羊毛冷衫，着多件衛衣再加多件防雪防風褸；下身着三條打底褲，出面再着面褲，着衫都着好多層，每日都好輪盡，然後每日拎腳架、相機同背囊出去，因為如果去到影唔到會好可惜，同埋做嘢咁辛苦，要去睇吓個世界。」

娜姐在過去一年先後拍了將於本月26日上畫的雞年賀歲年《小男人週記3之吾家有喜》、以及《29+1》和《女士復仇》，她說：「今年都幾滿意，三套電影都唔同戲種，所以都俾啲獎勵自己，plan呢個旅行。」