Larine 19歲生日被相睇 娜姐獻吻賀鄭丹瑞牛一

這些機會，又係屬於旦哥 (鄭丹瑞)的。話說旦哥在早前 (26/11) 61 歲牛一前夕，仍然忙於為「梁寬」出世30年的紀念作、雞年唯一一部真正港產賀歲片《小男人週記 3 之吾家有喜》開工，夥同片中索爆女友周秀娜和噴血囡囡 Larine (鄧月平)、老友記「大蠱惑」黎彼得及「Q太郎」文雋以及蔡瀚億 (BabyJohn)、陳友、張繼聰、蝦頭楊詩敏，在柴灣一影樓內影電影海報，期間劇組安排神秘環節，由娜姐說東拉西分散旦哥注意力，然後熄燈，登登登登──再由阿女 Larine 邊唱生日歌邊捧靚 cake 出場，兩位靚女左右開弓錫旦哥臉頰一啖，又陪他切打孖上的生日蛋糕，所以旦哥連許願都寧舍 sweet。
今年旦哥生日前夕獲一班台前幕後慶祝，梗係甜入心，講到生日願望，旦哥表示：「願望係一家人齊齊整整，全香港開開心心。」翌日生日正日，旦哥當然留給最愛，與家人共度，不過.....「正日一吹完蠟燭，要飛車去公司剪片。」
雖然旦哥在生日月開工未停過，但身邊親友及劇組工作人員都輪流為他賀壽。其實之前《小3》舉行煞科宴，當晚劇組已準備蛋糕，一早為旦哥及於本周日(4/12) 19歲生日的 Larine 提前祝賀。
入行後第一個生日點慶祝？ Larine 笑說：「我媽咪好搞笑，話今年我正日生日，帶個男仔嚟食飯介紹俾我識，我諗佢意思係相睇，佢驚我嫁唔出。其實我正日同前後幾日都要去《美選 D.n.A》，應該慶祝唔到，不過今年生日願望就係希望食多次 Daddy (旦哥) 整嘅百慕達三角太陽蛋三文治。」Larine又對伯樂旦哥非常感謝，「我同 Daddy 相處呢幾個月好開心，佢真係好錫我，當我自己女咁，我諗呢部戲旦哥教我嘅嘢，等如幾部戲嘅知識；佢好關心我，我有嘢搵佢，佢都會俾意見。」