剝衫露鯨魚線影海報 張建聲攬松岡錫Jeana

原著最強港產網絡作家向西村上春樹之都市驚慄電影《作家的謊言》，早前電影已拍竣並正趕後期製作，預算今年下半年上畫。首任監製兼男主角的張建聲 (Justin) 日前孖何佩瑜 ( Jeana ) 、松岡李那兩位索爆靚女拍攝電影海報，Justin 剝衫半裸上陣，Jeana 着貼身小背心及熱褲，至於松岡造型就暫時保密，到海報曝光時必定令大家嘩嘩聲，所以拍攝當日現場已不時尖叫四起，其中一幕係 Justin 要錫 Jeana 臉頰，又被性感到震的松岡從後攬住，效果激情噴血。這些機會，令男人葡萄到極。

 

《作》片故事內容講述 Justin 飾演的作家徐哲，與太太 Jeana 和兒子共組幸福家庭，一天他把樓上的單位租了給神秘又美艷的松岡，結果惹禍上身，引發一連串奇情故事。由於拍《作家》一片時，Justin 因拍《真‧三國無雙》增肥做張飛後戲接戲未停過，湊巧他亦設定其作家角色比較圓潤，故一直發福至今；而 Jeana 戲中本來就係師奶，所以她特登狂啪飯盒谷肥 15 磅，兩人一於圓鬥圓。

 

不過今次三人拍攝海報，雙J再度「短兵相接」，Jeana 話咁快已回復纖瘦，兼有些少腹肌；最近經常做 gym 的 Justin 就差啲啲，腰間仍有贅肉，就不斷被 Jeana 取笑當年擁有的人魚線慘變鯨魚線，似海豚、海獅、海豹，Justin 隨即說：「Jeana 都有增肥拍戲，之後係時間俾佢操番，佢 fit 到呢，但啲線錯晒！」之後他還扮海豚拍手掌，氹到 Jeana 鬼咁開心。Justin 表示近一個月一有時間已去健身減肥，「其實都減咗20磅度，再減多10磅度就差唔到多，都要啲時間嘅。」