鄧麗欣「細方」牽恩怨 Hazel思琦JC三點式放蛇

由錢國偉導演、黃永鋒及黃柏高監製的動作笑片《辣警霸王花》終於落實下月13日在港、澳及大馬三地同步上畫。這部電影延續了80年代《霸王花》的元素，由飾演惡死女教官的梁琤嚴教一班霸王花學員岑麗香、鄭欣宜、何佩瑜 (Jeana)、崔碧珈、李元玲、何佩珉及蔡潔等執行任務，過程有血有淚有笑有溫情。

《辣》片內容主要描述這班特警新丁為20年前任務失敗的霸王花復仇，所以電影由扮演上一代的霸王花包括鄧麗欣 (Stephy)、楊思琦、唐紫睿 (Hazel)、Jessica C (JC)、陳嘉桓和郭思琳放蛇掀起序幕。一眾靚女為逮捕恐怖份子，在泰國的酒店池邊等候目標，思琦、Hazel、JC和思琳均穿上性感比堅尼，尤其JC的出水芙蓉更見噴血，至於飾演Madam「細方」的Stephy就相對密實，着背心短褲上陣。

其後幾位靚女見目標出現，隨即在泳池展開激烈槍戰，生死肉搏，思琦亦唔錫身，親身拍攝出拳又起腳的鏡頭，由於打得投入，更不慎掛彩整傷手指；而當時仍未拍《G1格鬥會》的Hazel已見功架，甚有打女風範，不過身型就較有肉地，Hazel對此笑說：「梗係啦，嗰時肥得交關，冇咩運動，睇番啲劇照都好滴汗，起碼同而家爭5、6磅啦，反而JC就真係幾fit，同埋楊思琦都幾好身形，生咗BB都keep得好好。」

思琦則說：「拍呢套戲幾挑戰性大，Charlie(黃永鋒)俾咁嘅機會我打，都係盡量做，最好笑係Hazel話我有腹肌，原來我真係有啲，可能抱得我個女多，成日都用力。同埋拍時都有受傷，有場戲我夾到手指，係痛到好似冇咗手指咁滯。」思琦平日打扮密實鍾意包到上頸，着泳衣拍打戲罕極，她笑說：「係呀，所以着泳衣時嘅打底都黐到實，嗰時我係成班女仔中唯一嘅媽媽，Charlie仲話好好，唔覺呀，睇落好後生，我嘅自信心即刻番晒嚟。」