雪地影婚照臉青唇紫 石詠莉：好接近死亡嘅感覺

每個女人都視影結婚相為人生最重要project之一，石詠莉 (Sukie)唔例外，她和Patrick拍攝的結婚照除了令她畢生難忘和具無比大意義外，亦是她有生以來最痛苦的一次拍攝「工作」，她說：「我哋最初計劃去加拿大嘅時候，諗住當地天氣係十零度，冇諗過去到時天氣係零下，仲要落雪，但好感恩天公造美，俾我哋有個好靚嘅環境影相，但痛苦嘅係衫好單薄，有件婚紗係得一層lace，所以當時係由凍去到痛、痛去到痺、痺到跟住手腳同全身冇晒感覺，界乎係好似自己冇咗手腳，好接近死亡嘅感覺，但又幾有趣。」

Sukie憶述和Patrick影相時，她親眼睇住Patrick的嘴唇由本來紅卜卜，到慢慢變成愈來愈白到變成紫色，然後臉部又變青，當然她本人亦凍到全身僵硬，結果兩人係凍到相視而笑，好彩這對新人相當專業，為了盡快完成拍攝工作而出盡洪荒之力，交足功課俾攝影師。

其實Sukie自與Patrick拍拖以來，Patrick對女友任何事情都跟到足，所以Sukie對男友具百分百信心之餘，也樂意將她的下半生幸福交予這個男人手上，「自己人生入面遇到咁好嘅男人，自己係好幸運，呢個男仔非常細心，不停為我事業無私付出，嘔心瀝血做每一樣嘢。當佢同我求婚之後，我哋係稍稍推遲咗婚禮，但大家唔需要擔心，絕對冇走數呢件事。我好感恩生命遇到佢，雖然結婚呢個任何女人都憧憬嘅夢想未實現，不過今年就實現到自己生命入面另一個最重要嘅夢想，搞演唱會，希望大家都祝福我哋。」