「希望同呢個女人一齊變老」 鄧健泓定2017秋天圓婚

今日石莉詠 (Sukie)和鄧健泓 (Patrick)發佈在加拿大拍攝的結婚照，發佈婚紗相的原因，其實係因為Sukie和Patrick均曾表示會在今年結婚，但時至9月只聞樓梯響，不少朋友都懷疑Patrick走數，Patrick說：「因為呢排成日都有啲朋友話我都唔知係咪認真嘅，拖得就拖，我想話俾大家知我係好有誠意，希望同呢個女人一齊變老。我要做嘅嘢，喺能力同空間許可之下，可以做嘅嘢我做咗，求婚同影婚紗相我都做咗，係爭簽紙呢一步。」

Patrick續說：「的而且確我哋係諗住今年舉行婚禮，但因為我哋有呢個演唱會，我哋嘅婚禮會擺去明年，但如果大家喜歡嘅話，入場睇我哋嘅演唱會就等如睇我哋嘅婚禮，因為好想多啲朋友參與，人情係演唱會嘅飛，主菜係Sukie嘅歌，希望大家踴躍參與我哋嘅婚禮，但呢個婚禮我係唔會出場，只會係台後，哈哈！」

Patrick已定下在2017年秋天和Sukie圓婚，正計劃屆時在加拿大及香港兩地擺酒，Patrick說：「我好鍾意加拿大，我喺呢度留學，亦係我思想成長嘅地方，所以想喺加拿大影結婚相，同我嘅女人分享呢個咁靚嘅地方。」去年他在當地為女友操刀影唱片封套，順道拍攝這輯結婚相，回想當日情況，他會用慘作形容：「個雪地嘅景係真架，氣溫非常低，我地影嘅時候好慘，因為Sukie要着薄嘅衫，凍到痛、凍到紫同埋凍到發青，但呢個經驗係好難忘，同埋我好多謝Cindy同Alan呢次為我哋設計咁靚嘅婚紗。」