十月個唱優先訂購 欣宜雪糕女神熱到發燒

鄭欣宜 (Joyce) 加入樂壇6年，成績一直穩步上揚，有目共睹，今年其主唱之人氣歌曲《女神》更瘋魔全城，mv網上總 hit rate 至今已超過420 萬，成功締造近年 mv 神話。有見及此，Joyce 的經理人公司中國 3D 數碼娛樂及唱片公司星娛樂，決定為 Joyce 開齋舉行首個個唱，於10月21 及22 日假九龍灣國際展貿中心 Star Hall 連開兩場「鄭欣宜女神有問題演唱會2016」，而後日星期一 ( 5/9 ) 會開始進行網上優先訂票，票價分為 $580、 $480 及 $280。

之前 Joyce 以鬼馬 liu 鼻拍攝同名大碟《JOYCE》封套，破格又新鮮，所以她日前影演唱會海報，亦再度原用上次製作班底，概念方面繼續玩味十足，兼且冰火交融，因為當日着黑衫的 Joyce 帶住黑超咬探熱針又咬飲筒；除此之外仲吮手指扮自由女神，但她舉起的並非火炬，而係令人垂涎的雪糕。

今次個唱名為「女神有問題演唱會」，Joyce 表示可以解說為「我有問題想問」及「我好有問題」兩個意思，所以她才構思舉手姿勢，她說：「自從《女神》首歌出咗街後，有好多 fans 送自由女神像俾我，因為神像係攞火炬，我就將佢變咗雪糕，希望演唱會係幽默感啲，大家一齊開開心心。今次係我第一次個人演唱會，都想俾大家有深刻嘅印象。」