型男燭光晚餐vs平民即食麵 Chilam坤哥做「兵」爭女

張智霖 (Chilam) 繼早前發佈新歌《Hero》後，他和剛完成首個紅館個唱的吳業坤（坤哥）合唱的情歌《兵兵》全新mv（ https://www.facebook.com/Chi.Lam.827/videos/890453504432954/ ）亦於今日正式曝光，mv更會在hmv PLAY獨家首播。

《兵兵》mv講述兩男追一女，有型浪漫的Chilam跟鄰家男孩坤哥，同時追求mv女主角－就係曾被封為「民間港姐」的靚女吳凱欣。為配合歌曲內容，Chilam在拍攝當日以西裝恤衫兼打呔造形出現，貫徹其型男look施展浪漫追求攻勢：燭光晚餐兼送頸鏈，更獲吳凱欣餵食cake；打扮平實的坤哥則玩心思，陪女煲劇打機煮飯仔，又用筷子夾cake食好西，冧得吳凱欣眉開眼笑。雖然結局係吳凱欣轉平民feel睇漫畫又同Chilam打邊爐，男男誰勝是懸念，不過Chilam同坤哥明顯係「兵」，大贏家就係被追求的吳凱欣。

對於第一次正式合作，Chilam大讚坤哥：「佢唱得好好，佢就住我唱就差唔多。之前演唱會大家都合作過兩次，唱歌更加係第一次啦，幾開心個喎。我覺得佢係新一代、將來嘅歌神。」

而坤哥就話同自己非常欣賞的Chilam合唱好開心之餘，mv中「爭女仔」亦屬大膽嘗試：「唱方面個range好闊，我都唱到七情上面，張生就好輕鬆咁樣去解決咗。呢個年代，我覺得冇一隻男男合唱歌，所以我覺得呢隻歌大家都應該會幾新鮮，唔同資歷嘅歌手去合唱，我覺得都有一個好好嘅火花。」