神秘開P爆驚喜 8歲Celine拖妹妹賀父牛一

8歲小巨肺譚芷昀 (Celine) 現正放着悠閒暑假，日前其父譚順生 (Steve)生日，Celine和兩歲妹妹Dion及媽咪就整盅做怪，為Steve舉行了一個「我是歌手」神秘生日P，邀請近百親友及同事到賀，令Steve非常驚喜。
其實Steve本身是歌唱老師，Celine的巨肺歌藝由他一手教導，父女檔月前一同簽約GME中國後，適逢今次是加盟新公司後的首個生日，譚太便call齊Steve的學生和親友，瞞住老公在一間酒樓開P，Steve被同事呃去酒樓後才如夢初醒，一家大細衝出來為他慶祝牛一，夠晒surpise。
當晚Steve一班學生除了舉行歌唱比賽外，Celine亦分別以廣東話、普通話及英語唱生日歌，又拖妹妹一齊和老竇切cake，三父女同台唱歌sweet到漏，Celine更加開心到跳起；最搞笑的是兩歲Dion都有家姐風範，在台上做咪霸搖住pat pat獻唱BB話英文歌，讓親友們笑不攏嘴。
其實今次參與神秘派對，Celine係好驚但又好開心，她說：「我要同其他人一齊唔好講，好驚爹哋知，但又唔想呃爸爸，我好想佢開心。」Steve則笑說：「今次係我最驚喜嘅生日，原來太太籌備咗好耐，同埋囡囡、學生、同事演技都好高，我完全識破唔到，心裏面喊出嚟，好多好耐冇見嘅親友都嚟晒，係件好開心嘅事，最難忘係囡囡演技又進一步。」