秘赴韓國見GD造型師 莊思敏年底微整形

莊思敏 (Jacquelin) 因為長期開工拍戲，不停化妝及睡眠不足致皮膚變差，早前她趁有兩日假期，即飛韓國搵當地一位知名美容院的院長為其肌膚「救亡」。經診斷後，原來Jacquelin有皮膚敏感症狀，院長就為她進行一系列facial治療，令她馬上靚番。

此行Jacquelin在當地度過牛一之餘，兩日內更完成晒全個扮靚套餐，不單止去美容院急救皮膚，又去髮型屋化個韓妝set個靚頭，最難的是能與當紅炸子雞組合G-DRAGON及BIGBANG的星級造型師佳穎見面，對方還帶她去時裝店即場教授穿衣貼士；所以今次雖無艷遇，但都收穫甚豐。

韓國是整形之都，Jacquelin滾水淥腳秘密赴韓，問她會否擔心被誤會去整形？她笑說：「初頭都有啲擔心，所以我將全個去韓國嘅行程都拍低，咁就證明到我今次唔係整容，純粹真係做個facial，見吓啲化妝師同造型師，整吓頭化個妝。」不過Jacquelin亦直認想做微整型小手術，她表示：「去到韓國嗰邊同啲美容院長、化妝師傾完之後，我都好想去割雙眼皮，因為自己之前做過雙眼皮吊線，但都已經做咗六年，條雙眼皮都開始dup，而家間中要黐雙眼皮膠紙，都黐到有啲煩，所以好想年尾有時間乾脆去割埋雙眼皮。」