黃金塔前錫靚靚 禿頭Chilam260蚊窮遊西班牙

張智霖 (Chilam)和袁詠儀(靚靚)在(30日)晚播出的浙江衛視真人騷《一路上有你》第二季的新一集中，被委派執行冇啖好食的新任務來考驗夫妻間的愛與犧牲，今次兩人要在一日內以30歐元(約260港元)，靠對腳窮遊西班牙塞維利亞多個景點，並需於每個景點前拍照留念。

 

期間當Chilam和靚靚抵達景點之一的黃金塔，他們在塔前跳起影相時，負責揸機的工作人員偏偏影極唔sharp，Chilam夫婦立即轉陣影親咀相，然後火速邁向下一站跳蚤市場。行到斷腳的Chilam在市場內坐低飲啤酒小休，靚靚就分秒必爭走去買火腿，豈料因而使突，此時魔鬼主持金希澈出現，他願意為二人解決財困，但條件係要Chilam戴上禿頭假髮遊街半個鐘。

 

禿頭Chilam的造型超爆笑，靚靚笑到不能無法直視，反而Chilam極之玩得，在街上四圍向途人say hi，笑說大家都很喜歡他這個造型。最後，兩公婆走到最後一站的伊莎貝拉二世橋selfie，終於完成任務。其實今次Chilam和靚靚沿路出現不少問題，本來他們已打定輸數，豈料爆冷勝出，原來今次遊戲規則係一人坐時就一人企，兩公婆不可同時齊齊坐，從而體驗彼此的愛與犧牲，靚靚說：「一個家庭裏面，不能只有一個人犧牲，其實有時候是兩個人都要犧牲一點東西，才能維持這個家庭。」Chilam亦說：「如果肯為對方犧牲，我覺得就是愛的表現。」