MMA揪贏140磅龍小菌 唐紫睿遭搥胸：我豁出去拚死！

唐紫睿(Hazel)參加的Viu TV真人騷《G-1格鬥會》(9日)晚播出第二集，今次是節目出街後播映的第一場賽事──由125磅的Hazel對戰約140磅的龍小菌。面對全場最重磅、最大力的小菌，纖瘦Hazel不止全無懼色，兩人堅揪三回合後，最終更由Hazel贏點數獲勝！

昨晚Hazel相約Viu TV工作人員、訓練團隊及公司同事等共約60人，在佐敦一間火窩店打邊爐，順道欣賞賽事。期間每當熒幕播出有Hazel的畫面，全場例必大叫，但當播出她和小菌埋身肉博的鏡頭時，眾人都緊張得近乎停止呼吸，尤其見到大份小菌壓低Hazel，往她臉頰及胸部砌完一拳又一拳，全場嘩聲四起，隔住個「芒」都戥佢痛，在場的Hazel圈外男友Louis亦坦言肉赤。

原來當日賽前，Hazel父親因為腦中風入院，反而令Hazel立志打好賽事，希望家人睇到她並非在娛樂圈玩玩吓，對所有演出都交足功課，她說：「就係因為我爹哋出咗事，我豁咗出去拚死，一係死一係贏。講真我技巧唔好，我學咗個幾兩個月，好多人會話我唔識打MMA、好唔po，我就係唔po，但第一round我出咗鎖，我覺得交咗功課，而且我參加比賽嘅目的，唔想人哋覺得我嚟打醬油，係想俾人睇我嘅努力、學習同鍛鍊，我嚟比賽唔係嚟攞focus博出位。」所以她在節目內提到訓練的艱苦過程時，亦忍唔住喊。

賽事中孔武有力的小菌有如犀牛般撞向Hazel，向她窩頭樁心口，Hazel當然痛到飛起，不過她一路死頂，盡量忍住不流露痛楚表情，Hazel說：「龍小菌啲拳係重，但我本身唔係好怕痛嘅人，當時我淨係記住就算俾佢打到塊臉，都唔可以嗌或者表現痛楚，因為當咗有效攻擊會扣分，你見我中拳但冇嘢，因為硬食。」其後Hazel發力，亦打到小菌擦傷鼻流血，Hazel表示：「嗰吓我見唔到龍小菌流血，我淨係知道佢太大力，佢strong過我太多，我唔繼續出拳，佢可能會壓低我。其實喺場上面，好多時候唔知自己做緊乜嘢，你只係做本能反應，就係出拳、落鎖、出腳。」