攬妻整陶瓷重現浪漫經典 張智霖笑靚靚跳艷舞：鬼上身

張智霖（Chilam）和袁詠儀（靚靚）在浙江衛視真人騷《一路上有你》第二季最新一集中，在被列入世界文化遺產的老撾「浪漫小鎮」琅勃拉邦取景，今次兩人除了冒雨騎大象外，重頭任務係Chilam要瞞住老婆完成多個浪漫任務，例如兩公婆坐木船往陶瓷廠時，他故意倒瀉水要老婆幫手抹身；到達陶瓷廠時，他赤腳踩陶漿，又引到靚靚用毛巾幫他抹腳。其後靚靚親手整陶瓷，從後擁抱她的Chilam唱住冧歌《You Are My Destiny》，彷如重現《人鬼情未了》經典一幕，平日不浪漫的Chilam突然轉性雖則古怪，但靚靚一樣冧到爆笑唔停。
Chilam順利完成任務，緊接由靚靚表演，要引老公一齊完成一個包兩份食的「麵包之吻」、飲咖啡後由老公為她錫走嘴唇泡沫的「泡泡之吻」，以及「溫柔注視」三大項目。為了吸引老公注意，靚靚不惜在cafe內跳艷舞，一頭霧水的Chilam笑老婆「鬼上身」，還叫在場的一隻狗攻擊靚靚，笑到她彎晒腰。不過，張氏伉儷的默契實在無敵，醒目Chilam瞬間已知老婆搞邊科，火速完成三個浪漫畫面再度勝出，贏得住靚房的大福利。