鄧健泓跪地鑽戒求婚 石詠莉喊住嫁：冧爆！

石詠莉 (Sukie)昨晚(29日)在「IFPI香港唱片銷量大獎2015頒獎典禮」上雙喜臨門，憑去年與男友鄧健泓 (Patrick)共同製作的首張Hi-Fi碟《聽聽 Sukie's 》勇奪十大銷量廣東唱片，以及躋身十大銷量本地歌手。Patrick為賀女友連中兩元，特別在尖沙嘴一間酒店舉行了一個極盡神秘的驚喜派對，邀請逾半百親友出席，會上他突然捧着99朵粉紅玫瑰，拎出鑽戒向Sukie跪地求婚，令Sukie感動得變喊包，流着一臉幸福的眼淚向男友首肯作嫁。
昨晚這個神秘派對，Patrick只邀請至親和參與過唱片製作及發行的朋友到場，包括雙方家人及Sukie的老闆蕭定一等。事前全不知情的Sukie踏入宴會廳後，驚見大班親友拍掌歡迎，已立即喊到乙乙聲，這時台上的Patrick說：「今日呢兩個獎對我哋好大意義，因為一開始做呢隻碟嘅時候，我同佢講，我哋唔好等機會，我哋自己做啦，我哋嘅目標就係今晚嘅IFPI，結果我哋攞到。我哋做每一樣嘢都有目標，人生都係、愛情都係，我哋都有個目標，所以今日我想做一樣嘢，佢成日話我未求婚，我想喺一個right moment去求婚。我想講，多謝你，我唔富有，我會將我最好嘅同你分享，以後都係，永遠都係。」
這時手拎花束的Patrick跪在地上，掏出鑽戒向女友求婚，但他就緊張到失失慌，不時傻笑，其後他向Sukie發表愛的宣言，「呢三年我哋經歷好多，經歷佢最唔開心時間，亦都試過一齊做嘢嘅經歷，都有啲成績，希望將來我哋一路喺呢條船度繼續向前行，你願意嫁俾我嘛？」全程未停過喊的Sukie點頭肯嫁，Patrick即為她戴上鑽戒，兩人在嘉賓起哄下錫了一啖，場面溫馨感人。
事後Patrick說：「除咗拍戲外，我未試過求婚，但去到真實，原來好多嘢我唔識，好多嘢係一片空白，但都唔係好緊張，呢次由搵場地到整晒成個party，唔想俾太多人知，又冇人幫我，所以都籌備咗成個月。」至於送俾Sukie的鑽戒有多少卡？Patrick說：「價錢唔緊要，最重要誠意，我今日就算俾隻草戒子或者汽水樽蓋俾佢，我諗佢都會應承，因為佢已經知道個情意。」幾時拉埋天窗？Patrick表示今年是盲年，等女友今年完成第二隻Hi-Fi碟後才計劃婚事。
喊足一晚的準新娘Sukie，對於男友驚喜求婚則笑說：「係感動同喊，呢個party我真係唔知，只係之前覺得有啲奇怪，身邊啲朋友好似唔尋常，有啲古怪，Patrick又有啲電話蠱蠱惑惑咁，仲以為佢做嘢好辛苦又想我擔心，原來佢係搞緊呢樣嘢，我覺得好驚喜，佢真係好願意為我付出，係冧爆嘅。」