坐貨車 罰落水 Chilam靚靚坐輪胎漂浮過河

張智霖 (Chilam) 和袁詠儀 (靚靚) 參與的浙江衛視真人騷《一路上有你》第二季 (26日) 播出第三集，今集兩人要接受嚴峻的默契考驗。主持金希澈晨早流流請Chilam夫婦玩快問快答，二人因未瞓醒答輸問題，慘被罰坐小型貨車的車卡食盡風沙。
抵達老撾的萬榮後，Chilam夫婦接受第二輪默契測試。靚靚戴上巨形公仔頭扮米妮，不知情的Chilam同老婆心有靈犀，隨即扮米奇企到老婆身邊，成功扳回一仗，靚靚亦開心到攬住老公，而兩人勝出的獎品，就係獲安排坐靚車去水上樂園。不過，靚靚在水上樂園向老公發問三條問題，第一條係講出靚靚最喜歡的三個男藝人，Chilam答中李敏鎬、周潤發及他自己，全部bingo；但第二條列出靚靚最討厭丈夫的三種行為時，Chilam大包圍說：「懶惰、打麻將、出去玩、喝酒...」但正確答案係「不換衣服、去玩、不給她買包。」所以，Chilam被罰跳落水。
在問答環節中，Chilam答輸兩次，要兩度跳河；但之後情況更陰功，Chilam和靚靚中伏，不慎揀中用兩個大輪胎漂浮南松河，二人又坐又趴手腳並用扮槳划行，笑料百出，期間靚靚向其他旅客大叫「可以救我們嗎？」儒雅的Chilam向疲累的老婆降溫，說這條河叫愛河，靚靚即時笑晒，笑說：「我們終於有機會，在老撾的愛河共同游泳。」
經過一天海陸挑戰，Chilam夫婦除了獲獎一頓豐富晚餐外，更被選為默契第一名，被安排住大套房，總算苦盡甘來。