啪啪啪！ 摑阿Bob三百巴 莊思敏：打到手痛

莊思敏(Jacquelin)擔演的新片《PG戀愛指引》今日正式上畫，片內扮演過氣promote girl「鳳姐」的她除了增肥20磅搞到又肥又pair，因為人老珠黃被嫌棄、三五七時借酒消愁外，當中兩幕戲講述她飲醉時，總係忍唔住向暗戀她的林盛斌(Bob)兜頭大巴車發洩，尤其在大排檔飲醉酒的一幕，阿Bob大大話話硬食莊思敏二十巴，掌掌響到啪啪啪，仲要被打到臉登珠震晒兼紅晒，夠晒陰功豬，前晚舉行首映播到呢幕，觀眾笑位全中，所以阿Bob的肉體痛楚總算有價。
世事冇得被阿Bob看透，他本身同Jacquelin老友鬼鬼，以為扮情侶有so，點知...「我強烈同導演要求俾啲床戲同親熱戲我，莊思敏好正架嘛，但唔知點解冇囉。」冇得親熱之餘，仲要被掌咀兜巴星，阿Bob拍製作特輯時就說：「大排檔嗰場戲我好深刻，我諗嗰晚莊思敏差唔多摑咗接近我一百巴，拍咗六、七個take，呢百幾巴真係...我會記住，有一日我會還番俾你！」
提起這慘絕人寰的一幕，Jacquelin直認打到手軟：「我喺戲裏面嘅角色鳳姐，一飲醉酒就會打阿Bob，所以我不停掌佢嘴、打佢，嗰兩場戲加埋拍咗10take、8take都有，我諗佢加埋中咗二、三百巴。開頭我想細力打，但導演同監製唔收貨，想要大力啲、啪啪聲，想見到阿Bob肥臉啲肉會震，所以我真係用力打，有啲我又反手打佢，所以我都打到隻手好攰，都有啲痛，阿Bob塊面就紅晒。」
Jacquelin手痛不特止，另一場戲講她去飛鵝山尋找失蹤阿Bob，最後兩人相遇，阿Bob孭住Jacquelin落山，但實情當日凍到抽筋勁難頂，Jacquelin說：「我諗嗰日得幾度，咁啱落雨，之前段戲拍我喺山上跑嚟跑去搵阿Bob，到我搵到佢時，個天又大霧又落雨又凍，佢來來回回孭咗我4、5次，但落緊毛毛雨好跣腳，我同佢啲衫又薄，阿Bob拍嗰場戲係流眼水，我以為佢好感動，喊得咁勁嘅，後尾佢話：『唔係，係凍得滯，凍到標眼水！』但同阿Bob合作係好開心嘅。」