「小朱孝天」雙瞳燃腐女魂 吳承璟軟功唔掂霸氣強吻

總點擊逾 350 萬的台灣 BL 神劇《HIStory》，hmvod 日前 (6月22日) 播出第一季第二個單元《離我遠一點》大結局。兩位男一包括身高六呎、出身男模的吳承璟及「小朱孝天」宋柏緯劇中飾演一對無血緣關係的兄弟，兩人無厘頭同居，一齊瞓一齊食一齊返學一齊生活，老實大佬宋柏緯教扮演明星細佬的吳承璟做功課，照顧巴打起居飲食，朝夕相對變成男男CP。

 

哥哥宋柏緯一直被傳統異性戀抑壓變攣，我行我素的吳承璟就主動出擊兼不理世俗眼光，一時出軟功餵宋柏緯食飯糰，一時又霸王硬上弓㩒低宋柏緯在梳化強吻，搞到阿哥心情七上八落。今日結局就講到吳承璟向宋柏緯攤牌，愛他就一起生活，不愛就離哥哥遠一點，兩個男人非常糾結，激情戲、感情戲，笑和淚都放題盡現。

 

吳承璟和宋柏緯在單元內有親熱戲，其中一場kiss戲咀足10幾次，拍勻上下左右角度，至於兄弟同居的劇情當然有床戲，兩人就覺得比kiss更辛苦，因為又親密又無對白，彼此都聽見對方的呼吸聲，真的貼身到好尷尬。

 

今次吳承璟明sell高大靚仔壞男孩feel，但宋柏緯怕怕醜醜的演繹，幫細佬斟茶遞水、為細佬抹嘴唇咖啡泡的畫面，這些細緻體貼的舉動，令到大批腐女fans暈低；其實宋柏緯有一個萬中無一的特徵，就是他的左眼有雙瞳，他曾解釋「眼珠」是黑痣，有時放大有時縮小，他也當作是天生雙瞳，反正視力跟常人無異，而他亦因雙瞳引起粉絲們特別關注。