Update News

全裸爆汗肉搏坤哥 蔡瀚億:真係好核突

2019-01-21
蔡瀚億 (BabyJohn)在《荷里活大老千》扮演演員「舒奇」,但經常發生搞笑事,之前他戲中戲跑龍套扮大俠,卻被人打到嘔泡;在片場蹓躂時,又不幸被女演員兩度誤為色狼,連車兩大巴,到昨晚 (1月17日)「舒奇」孖住「墨基」吳業坤(坤哥)這個沙煲兄弟收工回家,兩人為爭廁所沖涼更搞出一場肉搏大戰,令人爆笑。
該場戲講述蔡瀚億和吳業坤這對巴打成身汗回家後,剝晒衫褲「全裸」爭廁所沖涼,互相死攬箝住對方,混亂中蔡瀚億捉住坤哥隻腳唔放,坤哥又咬蔡瀚億隻手,男男肉騰騰拉扯,卻被王子涵見到,仲恥笑二人「冬菇仔」。
蔡瀚億同坤哥在內地片廠拍攝這場戲時,時值炎夏,氣溫接近40度,由於片廠係鐵皮搭建,廠內熱到抽筋,兩人未埋位已經爆汗,所以黐立立埋身肉搏,真係會黐肉,感覺唔多好受,蔡瀚億提起都忍唔住笑,「其實呢場戲諗起都覺得核突,因為拍嘅時候天氣太熱,我同坤哥兩個熱到成身濕晒,啲汗係黐晒喺個背脊度,乾咗又熱番又再濕番,跟住攬埋一齊打交,希望觀眾睇完覺得好笑,因為真係拍得好辛苦,辛苦嘅唔係動作,而係我個身掂到佢個身,我而家諗番都覺得點解當刻我可以做到?真係唔係好接受到。」