Update News

工作忙爆 半年拍6廣告 張建聲代言美容院慳護膚錢

2018-06-04
藝人工作經常要日夜顛倒,甚至捱通宵拍攝,要keep住「戰鬥格」,當然要定期護膚,男星都一樣。近年工作不斷的張建聲(Justin),戲接戲拍攝雖然忙到爆,但日前都抽空出席美容院開幕,仲成為代言人;他表示自己是個懶人,平日工作忙又不會做護膚的程序,今次可以做美容院代言人可謂一舉兩得,有錢收之餘又可護膚。
 
Justin表示第一次做美容院代言人好開心,雖然是「朋友價」,但有人幫手護膚已經值回票價:「我同美容院老闆識咗好耐,傾開佢公司想搵代言人,我又想做護膚,所以一拍即合。我平日好少打理皮膚,開工要化妝,十幾個鐘後先落妝,跟住就瞓覺;所以平日護膚只係飲多啲水,食少啲煎炸嘢,勤力啲洗面。我其實係比較懶嘅人,如果有專人服務就好啲。」
 
除了片約不斷,Justin亦好受廣告商歡迎,今年已接了六個廣告同代言,包括有《Miracle+》美容院代言人、《安信財務》、《yahoo》情人節特輯、《OAKLEY》太陽眼鏡、《再思社區健康組織》拍攝愛滋病影片及《爆炸糖》廣告等;對於獲得這些機會,他表示:「今年真係好感恩,人哋賞識我先有呢啲機會,所以我會繼續努力。」