Update News

新片扮張建聲老婆 Jeana三星期暴肥15磅

2018-03-14
原著香港最強網絡作家向西村上春樹之人氣力作《作家的謊言》,現時已拍得如火如荼,首次擔任監製兼任男主角的張建聲 ( Justin ),片中確實艷福不淺,分別與松岡李那和何佩瑜 ( Jeana ) 有感情戲,松岡日前才透露拍這部戲時冇咩衫着,經常要穿 underwear,新紮監製 Justin 唔俾衫松岡着之餘,相比之下,Jeana 就日日有飽飯食;不過,呢啲飽飯又唔係人人哽得落,事關飾演張建聲老婆「琦琦」的 Jeana 為角色需要而增肥 15 磅,所以她的臉頰、手腳、身形都變得圓潤,仲現出個迷人肚腩仔。
 
Jeana 向來身材 fit 到漏油,除了天賦好身段,平日她都有做運動同注意飲食保持健美,但今次要做好師奶角色決意為藝術犧牲,日食夜食谷肥自己,結果她在短短三星期就膨脹 15 磅,成功達標。張建聲當然大感滿意:「好感恩戲入面有兩個好嘅女主角,松岡李那要練廣東話、拍 love scene,有好多困難;Jeana 為呢部戲就增肥,餐餐食兩盒叉雞飯,食雪糕,又薯片又汽水,望到心痛架,見到佢為角色付出、好入戲,係一個全新嘅 Jeana,作為增肥過來人,我明白難處,明明食唔落又要夾硬隊,睇住一個女仔咁樣付出係好值得尊重。」
 
至於 Jeana 就在 facebook po 隊兩個飯盒的相片,她寫道:「以下動作有專人訓練切勿模仿,為了琦琦這角色,每餐自己吞下兩碗飯。」Jeana 透露其角色是個有小朋友的家庭主婦,但又有陰暗一面,同以往演出大不同,她說:「我個角色唔係靚靚女女,成個妝都要憔悴,身形要圓潤啲,靚嘅就交俾松岡。呢排我係咁食澱粉質食物,肥 10 幾磅唔難,初時我係咁食嘢增肥係冇胃口食唔到,食飽冇耐就要食啲酸嘢令胃口好啲,依家適應咗,一日好似食緊三日嘅嘢。我會俾個期限自己嘅,拍完之後兩個禮拜內要瘦番。」
 
Jeana 稱她為演出不怕肥不怕醜,在她眼中,趙薇在《親愛的》演農婦師奶以及查理絲泰朗 ( Charlize Theron ) 在《美麗女狼》( Monster ) 增肥扮魔頭,都是很美麗的角色,所以對於自己當下谷肥的 130 磅身形毫不介意。