骆振伟吴嘉熙busking 王宗尧带队杀入老尖斗大妈

viu TV 播映中的犯罪懸疑劇《PLAN B》被網民推為貼地作品，戲中情節及對白經常反映到時下民生狀況，《PLAN B》一眾演員作為香港市民當然留意社會，昨晚眾人即興殺入尖沙咀天星碼頭 busking，由王宗堯 ( Greg ) 帶隊聯同陸駿光、駱振偉 ( Thor )、吳嘉熙 ( Cheronna )、泥鯭@Rubber Band及方子駒等上演街頭獻唱，引來不少途人圍觀。

 

王宗堯、陸駿光、駱振偉在《PLAN B》飾演元朗蠱惑仔，昨晚他們走去尖沙咀霸地盤唱歌，雖然霸到靚位，但因為玩即興事出突然又器材不足，一度有人冇聲，好彩得另一演員泥鯭拖篋帶齊架生救命，結果才得以順利進行。曾是歌手的 Thor 帶埋結他到場，眾人分別唱出《與我常在》、《海闊天空》、《冷雨夜》、《發現號》等等，個個唱到身水身汗，有途人細心遞上紙巾，更有阿婆放低廿元紙幣兼豎起姆指稱讚。

 

昨晚由 Greg 負責吹雞，他笑說：「我哋喺拍攝以嚟上下好齊心，宣傳又好訪問又好都係一呼百應，喺有限資源下將香港發生緊事自己行入去先，所以今次揀咗大媽都進佔嘅天星碼頭，我哋由元朗殺去尖沙咀，Cheronna 係我哋唯一嘅女將，要鬥大媽。」 Cheronna 在 Thor 彈結他下唱《海闊天空》，但這首歌勁高 key，要唱真係唔容易，她說：「冇辦法，呢個 busking 好突然，所以冇咩準備，但首先係泥鯭救咗我哋一命，好彩阿 Thor 又識彈結他，係好開心嘅，睇到班人好熱血、好有愛，為《PLAN B》大家落力做咗好多宣傳。」泥鯭則說：「每人出少少器材，佢哋又拎咪又拎結他，好似我哋拍劇咁，要夾埋一齊先成事。」

 

Thor 就被讚原來唱歌咁好聽，他表示自己未試過在港玩 busking，「我公司有個黃劍文，叫過我 200 次出嚟 busking，我真係唔敢，我為咗《PLAN B》，大佬阿 Greg 吹雞先出嚟，我係出嚟兩個鐘前先開始搵譜，但我哋團結嘅精神喺今晚展現到，係幾 happy 嘅。」Greg 又讚方子駒把聲好聽，方子駒即笑稱：「我冇唱過歌，但我把聲好甜，因為我係甜生 ( 戲中角色 )。」陸駿光唔肯唱但樂於四圍敲擊伴奏，他直言：「我唔識唱歌，咪扮打嘢扮打鼓。今晚我係支持《PLAN B》團隊搞咗個咁好嘅 busking，佢哋個個唱歌都好聽，我就混水摸魚，最緊要多啲人留意套劇就得啦。」