最新消息
影帝影后天后仗義客串 黃子華 8 分鐘鳴謝 28 紅星
2018-02-09
35 次多謝，8 次唔該，7 次 thank you，子華神連聲多謝都難以報答各位巨星紅星朋友的幫忙。講嘅係由子華同佘詩曼主演、於 2.15 年三十晚喜慶出籠之狗年賀歲笑片《棟篤特工》，片中子華當然發揮其抵死幽默風格，阿佘亦有不一樣的「樣衰」演繹，但除了兩位男女主角及主要演員 C 君、蘇麗珊等外， 仗義客串的巨星紅星更係超級多兼爆驚喜，幾對手的手指數唔完，當中有影帝、影后、天后、視后等等人氣演員，最難得係每位出場都夠特別又 sharp 醒，令整部戲星光瀉地。
事實上，本地電影已久未試過有如此多的巨星助陣，自稱「票房毒藥」的子華獲眾多巨星朋友友情客串，實在無言感激，所以子華特別自拍了一條接近 8 分鐘的鳴謝系列短片 ( https://www.facebook.com/dayowongoffical/videos/1245900122209524/ )，逐一答謝 28 位巨星紅星的幫忙，名單包括鄭秀文、楊千嬅、許冠文、譚詠麟、張智霖、蔡少芬、鄭丹瑞、鄭中基、吳君如、草蜢、王敏德、鄧兆尊、張繼聰、張達明、苑瓊丹、盧海鵬、許紹雄、林雪、羅蘭、鄭欣宜、林子善、張國強、趙榮、詹瑞文、湯鎮業、盧惠光、白只、專家 Dickson。
子華表示：「拍呢套《棟篤特工》係破咗我人生記錄，我係從來冇試過一次過欠咁多人欠咁多嘢，今日喺度俾啲耐性，容許我一次過多謝番咁多位幫過忙嘅朋友，無償、衷心嚟拯救我呢個票房毒藥嘅朋友，多謝你哋。大家俾啲耐性、幫我俾啲掌聲以下呢啲人士好冇？」多謝又多謝，子華衷心感謝每一位幫忙的圈中朋友；去到片段尾聲，子華補充說：「我覺得我依家好大鑊，因為我一定漏講咗啲人，我漏講咗嘅希望多多包涵，首映之後我再請你哋飲嘢，希望你一定到，到時我一定親自多謝你。比如 Dickson，我唔記得多謝你，多謝你，有你喺度我哋毒男就有晒地位，即係你呢個角色做得好；仲有詹瑞文，仲有...真係講唔到咁多，首映見，各位。多謝晒。」
子華一人一個鳴謝系列：
紅星1【許冠文】
「真係眨眼即過角色」
第一個我需要多謝就係許冠文，我多謝 Michael，我唔記得 Michael 係從來有冇幫人客串過，但係佢竟然嚟到幫我客串做一個真係眨眼即過角色，十分之多謝 Michael，thank you。
紅星2【譚詠麟】
「拍咗一晚歌都唱埋」
跟住 Michael 之後，呢個又係冇可能出現，呢個叫譚詠麟，呀校長又係，我監製話去搵佢，我話你去搵吖，啋你都傻！點知佢真係出現咗！仲嚟到係唔需要食我哋任何食物，咁就拍咗一晚，歌都唱埋，真係萬分感激，校長。
紅星3【鄭秀文】
「自己set晒頭造晒型」
呢一段我要多謝鄭秀文，Sammi，佢嚟幫我哋手，就唔單止就咁嚟幫，自己 set 晒頭、造晒型咁樣先至走嚟幫我哋扮演戲裏面個巨星，就係鄭秀文本身。多謝晒。
紅星4【楊千嬅】
「你做咩嚟幫我哋嘅？」
除咗鄭秀文，我又多謝楊千嬅啦，我唔識千嬅架嘛，佢嚟到，我真係忍唔住問，你做咩嚟幫我哋嘅？我好記得佢話，因為好玩囉，即係有啲咁嘅人嘅，呢個世界？十分感謝呢個世界仲有啲咁鍾意玩嘅人，唔該晒，千嬅。
紅星5【林子善】
「佢又係話嚟即嚟」
我嘅徒弟，子善，好多謝佢，佢又係話嚟即嚟，唔理做咩戲，唔該晒呀，子善。
紅星6【張智霖】
「做一樣咁得意嘅嘢」
我又十分多謝 Chilam，因為 Chilam 嚟到係做一個角色呢，我係諗唔到佢係肯做一個咁樣嘅角色，即係冇諗過咁靚仔嘅張智霖，係會做一樣咁得意嘅嘢，多謝晒，Chilam。
紅星7【鄭丹瑞】
「想像唔到佢夠膽做」
呢個又真係一定要多謝啦，鄭丹瑞旦哥，因為佢做咗一樣嘢，唔單止客串一兩日，佢係做咗一樣嘢我相信佢從影以來係未做過、大家係想像唔到佢會夠膽咁做，係全力投入，方法演技去做呢個角色，多謝晒，旦哥。
紅星8【鄭中基】
【又係走嚟做足幾日」
「多謝鄭中基，Ronald！Ronald 又係走嚟做足幾日，真係喺啲好辛苦、好惡劣嘅環境裏面拍，又濕又盛佢又嚟，嚟一嚟走咗佢又嚟，無言感激！唔該晒，Ronald。
紅星9【吳君如】
「大恩大德沒齒難忘」
吳君如小姐，十分感激你，你大恩大德，沒齒難忘，做完戲仲請食飯，希望有下次再請我食飯，thank you。
紅星10【蔡少芬】
「話幫過我之後要還」
咁有一個人呢，真係唔多謝佢唔得，叫 Ada、蔡少芬。蔡少芬小姐，十分感激你，十分多謝，佢好似話幫過我之後要還嘅，我覺得你根本唔使我還，你都嚟咗，多謝晒你。
紅星11【張國強】
「我代監製向你道歉」
張國強哥哥，多謝你呀，你又係，我代我監製向你道歉，佢好似五分鐘前叫你，你就五分鐘後嚟咗，非常感激你呀！
紅星12【林雪】
「拍呢套戲差啲死咗」
呢個好嚴重，呢個真係要嚴重咁講，呢個係拍我哋呢套戲差啲死咗：林雪、雪哥。好感激，我好開心可以同你拍完，你知唔知嗰日幾驚呀，祝你喺第二度拍緊戲都一切順利，多謝你，雪哥。
紅星13【王敏德】
「冇一個更short嘅notice」
Michael，王敏德，真係感激你，你真係冇一個更 short 嘅 notice，咁就話嚟，即刻嚟咗，thank you you very much。
紅星14【草蜢】
「傑仔同我玩通宵」
我多謝阿智、阿傑、阿細，你三位草蜢，嚟到咁幫忙，玩足一日，特別呀傑仔，你兩兄弟都走咗，你同我哋玩通宵，十分之感激，唔該晒。
紅星15【羅蘭】
「我保證：你個造型，殺！」
羅蘭姐，呢個世界係得你一個叫我子華哥，我唔好意思受，點知你又嚟幫我，真係再一次感謝你，但我保證：你個造型，殺！你個場景，殺晒！有你喺度，掂晒！
紅星16【鄧兆尊】
「做唔可能會做嘅角色」
我多謝兆尊，兆尊又係話嚟就嚟，做個一般都唔可能會做嘅角色。
紅星17【苑瓊丹】
「有毛有翼飛去好遠」
兆尊之外，苑仔啦，苑仔依家真係有毛有翼到飛去好遠嘅地方，唔需要理我哋，但又係一叫就嚟，多謝你，苑仔哥。
紅星18【張繼聰】
「不問戲份不問一切」
多謝阿聰，張繼聰，啱啱好似嗰排生咗仔，又係嚟，不問戲份、不問一切咁樣就幫我手，thank you ~ very much ~
紅星19【張達明】
「改咗期幾日又照嚟」
呢個當然要多謝，我老友，張達明，改咗期幾日，佢又照嚟，唔該晒，達 Ming，首映一定要嚟睇。
紅星20【趙榮】
「得閒落嚟搵我食飯」
有位好朋友，趙榮，由廣州落嚟，拍完即刻走番上去，非常感謝，多謝你，得閒落嚟搵我食飯。
紅星21【白只】
「你做一個死咗嘅人」
白只，唔該晒你，你又係，完全都唔問要做乜嘢，話就嚟咗啦，你冇諗過你做嗰個原來係一個死咗嘅人，係咪先？唔該晒。
紅星22【盧海鵬】
「令我成套戲好興奮」
鵬哥，盧海鵬先生，第一場見到你，令到我成套戲都好興奮，多謝你、多謝。
紅星23【許紹雄】
「嗰隻老咗都震嘅手」
Benz 哥，自己人，唔使多謝啦，唔可能啦...唔多謝，係咪先？有你 Benz 出一出場，特別我哋監製同導演開心到呢，你嗰隻老咗都震嘅手...真係唔該晒你。
紅星24【鄭欣宜】
「你唱嗰首歌好勁」
欣宜欣宜，你唱嗰首歌好勁，你唱呢首歌係我聽過全香港最勁嘅電影主題曲，我話嘅！多謝晒，thank you。
紅星25【湯鎮業】
「呢世人冇諗過同場」
湯鎮業哥哥，又感激你，我呢世人冇諗過有機會同你同場做戲，多謝你咁投入幫咗我呢個大忙，thank you。
紅星26【盧惠光】
「成套戲霸氣都唔同」
盧惠光哥哥，有你喺度，成套戲嘅霸氣都唔同啦，thank you you。
