最新消息
「Chan女郎」大堆頭數子華神 謝安琪李婉華驚喜登場
2018-02-08
黃子華在狗年賀歲猛片《棟篤特工》內飾演多情特工「Mr.Chan」，因為執行任務而向 madam 佘詩曼悔婚，自此阿佘憎到佢入骨入血，窮一生玩謝 Mr.Chan。不過 Mr.Chan 堅強、敏捷、智勇雙全，確實令唔少女死喺佢手上，對佢又愛又恨。
Mr.Chan 人生中究竟激嬲幾多個女人，可能數之不盡，但喺以下呢條片入面 ( https://www.facebook.com/hmvDigitalChinaGroup/videos/1635094613250640/ )，一眾「Chan女郎」包括黑人白人阿嬋大媽，加埋16位女星齊齊數爆 Mr.Chan！16位女星中，有參演《棟》片嘅佘詩曼、蔡少芬、吳君如、蘇麗珊、鄭欣宜、苑瓊丹；但估唔到出現嘅「Chan女郎」更多：有周秀娜、胡杏兒、陳慧珊、廖碧兒、陳法蓉、雨僑、僅得10歲嘅 Celine (譚芷昀) 同 4 歲妹妹 Dion；更估唔到嘅係有兩位天后神奇出場，就係莫文蔚及剛剛產後復出的謝安琪。終極更更更估唔到嘅係 ─ 竟然有李婉華！
早年已移民加國的婉華，今次為撐子華新片而激罕出鏡，片中佢仲嚴重警告子神：「喂！你再唔出現，我報警架！」
其實今次電影公司炮製這條「Chan女郎」數爆 Mr.Chan 宣傳片，被邀請拍攝的女星都一口答應，各自諗盡方法去表達對 Mr.Chan 的愛與恨；所以、證明：Mr.Chan 真係好有女人緣。
