最新消息

王宗堯驚讚搵命搏 歐錦棠英國爆肌排戲作嘔

2016-12-20

王宗堯和歐錦棠主演的舞台劇《科學怪人》1月6日正式在上環文娛中心公演,兩位主角王宗堯 (Greg)和歐錦棠為演出各自磨刀。飾演科學怪人的歐錦棠更自費去英國10日,隨一位阿根廷的演藝女導師學習形體動作,以在演繹科學怪人在誕生後由一劈肉進化成人的7分鐘過程。
阿棠在英國時,上堂以外的時間主要跑步及到健身室玩gym,經過苦練後已有成績,不止身形變得健碩,更爆肌爆筋好霸氣,他說:「去到英國有keep fit舉大隻啲,食嘢又清減啲,食沙律、雞肉、扒,淨肉,結果去倫敦係瘦咗幾磅返嚟。」今次阿棠隨師上了四堂,每次三粒鐘,兩人首日見面時,老師先看阿棠的靈活性及體能,翌日他正式學戲就大鑊了,「呢一世都難忘,因為直落三個鐘頭,老師冇要求休息,佢鍾意一氣呵成。未試過上完第一堂,我即刻標入廁所嘔,好耐未試過練嘢練到嘔,同體能無關,原來練形體係精神負苛重過體能好多。」
對於阿棠的付出,Greg連聲讚嘆不絕,「棠哥認為我哋必須用自己嘅方式將作品呈現,令觀眾覺得唔會欺場。製作規模上,香港冇辦法同外國資源相比,所以我哋要用自己嘅方法去做,就要用『攞命搏』嘅精神,亦係香港電影最核心價值,棠哥係好有經驗嘅演員,去到呢個年紀,依然堅守信念,而唔係食老本,所以佢搵我合作真係好開心,二話不說答應,毫無計算演出成本、時間。」阿棠去英國上堂,繼續學習,這份專業精神也讓人五體投地,Greg說:「棠哥要喺七分鐘內由有意識、學唞氣、肌肉發展到企得起身,令觀眾覺得佢演得好犀利,好震撼!知道佢最近好辛苦操fit自己,又幫緊杜汶澤嘅戲,同時要經營呢個舞台劇,所以估唔到一個做開舞台劇、演戲底子厚嘅演員,依然落咁多心機特登學一個形體,我覺得佢係非常了不起。」