【情侶檔搞新碟】 鄧健泓瞓雪凍傷 石詠莉班夫險炒車

石詠莉 (Sukie)去年與男友鄧健泓 (Patrick) 共同炮製的首張Hi-Fi碟《聽聽 Sukie's 》成績斐然，分別獲得IFPI的十大銷量廣東唱片及十大銷量本地歌手，兩人再度拖手製作的第二張Hi-Fi碟《Welcome 2 My Destination》，亦已於今日(28/9)正式上市。

近日Sukie忙於排練下月9日舉行的處女個人演唱會，同時又要兼顧出新碟，實在忙到抽筋，事關她和男友對開騷及做碟都親力親為一腳踢，製作這張唱片簡直出晒血汗，特別係去年11月二人前往加拿大的班夫 (Banff)影婚紗相兼唱片封套時，還以為當地陽光普照，但人算不如天算，到埗後居然漫天風雪，令所有事情生變。

Patrick笑說：「原本封套嘅諗法並唔係冬日感覺，係諗住Sukie着短褲小背心，有啲牛仔look，喺highway影，點知氣溫預計唔到，我哋就由夏天變成冬天嘅感覺。」雖然加國氣溫極低，但操刀充任攝影師的Patrick依舊專業，除手套瞓雪地為女友影靚相，結果就凍到雙手發黑及爆裂，令Sukie心痛不已。

其實二人今次去班夫，因為這一場風雪而出現不少意外，當中一段上山驚魂，更加嚇到Sukie呱呱叫，Sukie說：「嗰日我哋諗住去某個地方影封套，點知前一晚落雪，出發嘅時候要揸車上山先去到目的地，但因為落雪同天氣凍，路面結咗冰，我哋架車又前驅，塞咗喺條斜路度，一鬆油架車就sir落去，但一踩油架車又唔去，仲爭啲撞到前面架車同後面架車。最驚險係對面線架車落山，好似冇Brake咁迎頭衝落嚟，同我哋架車係貼住過，好鬼驚，但好彩冇事。」