《29+1》搶飛一個鐘售罄 娜姐欣宜激動嘩唔停

由彭秀慧執導、周秀娜（Chrissie ) 和鄭欣宜（Joyce ）主演之都市小品式女性話題電影《29＋1》，與由中國導演馮小剛執導、范冰冰主演的《我不是潘金蓮》並列，齊齊被下月舉行的香港亞洲電影節選為閉幕電影；而今日大會預售兩場下月31日於百老匯電影中心播放的《29＋1》，結果開售短短一個鐘已全院滿座，令人鼓舞。

《29+1》劇組得悉這個消息，當然非常興奮，Joyce雀躍地說：「嘩！好開心呀！我初初知道呢套戲被揀咗做閉幕電影時已經好感動，以前我演嘅戲係搞笑或者客串多，今次係我一部戲份比較多同認真嘅電影，同埋我拍嘅時候宣傳緊《女神》同「JOYCE」專輯，工作係緊張到爆炸，而家見到套戲喺電影節咁好反應係好開心，希望大家鍾意，呢部係非常有心嘅戲。」

Chrissie同樣嘩嘩聲嗌出來：「好高興，多謝大家支持香港電影同《29+1》，一直到電影正式上映都仲要大家支持。拍呢套戲對我嚟講係特別嘅經歷，亦係緣份，拍嘅時候正正我係29+1，我亦好鍾意呢個故仔，所以我除咗感激之外都係感激。」

導演彭秀慧表示，對《29+1》能夠躋身電影節已經覺得榮幸和感恩，「開票房前雖然聽到很多人想搶票，但未知道真正反應會是如何，但今天一點鐘開始收到不同朋友message我話好難買，也有朋友拍照告訴我買到了，窩心！這個舞台劇在這麼多年累積了一定粉絲，今次電影節我相信有部分是不認識《29+1》但對這件事好奇的觀眾，我更是興奮，10月31日將會是我其中值得記住的一天！」

《29+1》為彭秀慧於2005年首度發表的自編自導自演舞台作品，劇中一人分演兩角，描寫女生踏入三十歲心態，八年來十度公演，累積演出九十一場，觀眾超過四萬八千人次，是本地最受歡迎女生獨腳戲。今年《 29+1 》從舞台躍上大銀幕，由彭氏編劇及執導，並由周秀娜及鄭欣宜分別飾演兩位女主角。