新春嘆鹹餐 張建聲出蠱惑冧汕尾粉絲

張建聲(Justin)日前到汕尾一間酒吧登台，趁新年賺外快，今次他在當地更獲客戶熱情款待，宴請他吃潮汕著名的鹹蝦、鹹蟹及地道蟹魚粥等，好味到令他停唔到口，Justin笑說：「個客好好呀，帶咗我去食呢啲我最鍾意嘅地道海鮮，喺香港都未必食到咁正宗，同埋潮汕係個幾有特色嘅地方，希望嚟緊多啲接呢類型登台，自己可以遊覽吓，又可以一路做一路玩。」
Justin去潮汕亦入鄉隨俗，登台時用潮汕話講「大家好」、「恭喜發財」，之後就展開其「蠱惑」之旅，唱了四首鄭伊健和陳小春的歌曲包括《友誼之光》、《友情歲月》、《一生愛你一個》及《神啊救救我》，由於這些歌耳熟能詳，現場數百粉絲一齊大合唱，氣氛勁high，之後Justin又請歌迷上台玩包剪揼小遊戲，勝出者可獲影碟，所以反應奇佳，個個爭崩頭上台。
事後Justin表示：「呢次登台幾好玩，自己對演出好滿意，客人都好斯文、好熱情，我覺得有啲唔夠喉，可以玩多陣添。我唱嗰啲係飲歌，尤其《一生愛你一個》，係好冧嘅，其實我好鍾意浩南哥(伊健)同山雞哥(小春)啲歌，佢哋嘅電影太深入民心，相信同國內朋友都識唱呢啲歌，寧願揀大家有共鳴有回憶嘅歌，大家識唱一齊唱會好玩啲。」