陈诗慧大阪遇柯震东 王宗尧游环球影城丧玩新嘢

去親日本，行到腳斷係必然。男神王宗堯(Greg)早前趁住空檔，與老友陳詩慧 (Eva)及公司同事遊日散心，期間男神team試過一日內由東京去大阪環球影城再返東京，都咪話唔攞膽。

今次五day日本trip，日日行程飽滿，除了例牌濕平同食好西外，Greg和Eva仲專程去大阪環球影城，因為環球影城於今年初舉行15週年限定企畫的「UNIVERSAL COOL JAPAN」系列，增添唔少新game，當日兩人就先後睇晒3D、4D的「哥斯拉The Real 4-D」、「進擊の巨人：The Real」和「Monster Hunter～The Real」，又戴VR眼鏡玩「EVA 新世紀福音戰士 XR飛車」嗌到冇命；之後仲未夠喉，再玩「哈利波特4K禁忌之旅」、「蜘蛛俠驚魂歷險記」、「大白鯊」等等，總之由天光玩到天黑，非常盡興。

事後Greg說：「我覺得最好玩係福音戰士，係戴VR玩嘅過山車，我好鍾意刺激嘅遊戲，戴住副眼鏡喺VR世界入面，加上過山車嘅衝力，好好玩呀。」Eva則唱反調，因為逢係玩轉來轉去的遊戲都頂唔順，「我唔係好喜歡VR，會作嘔頭暈，玩玩吓要除咗副眼鏡，但原來唔戴VR睇又係另一種感覺。」遊主題樂園的其中一項節目，當然係行精品店。話說男神逛街時亦遇上香港fans影合照，但Eva反而變身fans，因為撞正柯震東，Eva見機不可失仲立即合照留念。

Greg同Eva在環球影城買到滿載而歸，當坐新幹線回程時，個個都攰到坐地休息。其實今次去日本，曾在日本拍過電視劇的Greg直情老馬識途，唔單止識路、識坐車，仲最叻講日文，所以全程做導遊，為Eva和同事打點一切，超窩心。